कराड : मराठी वीरांच्या अफाट शौर्याची कहाणी सांगणारा पानिपत चित्रपट पाहताना, त्यात वाजणारी तुतारी अंगावर रोमांच उभे करते. ही तुतारी कोणी वाजवली आहे माहित आहे का? ही तुतारी वाजवली आहे कराडमधल्या तरुणांनी. कालौघात नष्ट होण्याच्या मार्गावर असलेली ही मराठी मातीतली लोककला इथल्या काही युवकांनी जपली आहे. त्यामुळे आज बॉलिवूडमध्येच नव्हे, तर सातासमुद्रापार तुतारीचा नाद पोहोचला आहे.
कराड तालुक्यातील कार्वे येथील कृष्णात गुरव व विरवडे येथील गजानन गुरव, उंडाळे येथील रत्नदीप गुरव यांनी पुढाकार घेऊन सातारा, सांगली, कोल्हापूर जिल्ह्यातील गुरव समाजातील युवकांना एकत्र करून शिवकालीन लोककला तुतारीवादन हा ५० ते ६० युवकांचा समूह तयार केला आहे. विविध कार्यक्रमांमधून हे तुतारीवादक ही पारंपरिक कला सादर करतात.
या ग्रुपच्या पांडुरंग गुरव, कृष्णात गुरव, गजानन गुरव व हरिश्चंपद्र गुरव या कलाकारांना पानिपत चित्रपटाचे संगीतकार अजय-अतुल यांनी या चित्रपटात तुतारी वाजवण्याची संधी दिली.
२०१७मध्ये झालेल्या आयपीएल क्रिकेट स्पर्धेतही ही तुतारी घुमली आहे. हा आवाज चित्रपट संगीतकार अजय-अतुल यांच्या कानी पडला व त्यांनी तुतारीवादक पांडुरंग गुरव यांना पानिपत चित्रपटासाठी तुतारीवादन करण्याबाबत विचारले. गुरव यांनी या प्रस्तावाला तत्काळ होकार दिला. सहा महिन्यांपूर्वी या तुतारीवादनाचा कार्यक्रम पुण्यात संपन्न झाला.
आज पानिपत चित्रपट धडाकेबाज यश संपादन करत असून, या चित्रपटात कराडच्या गुरव समाजाने दिलेली तुतारीची धून ही बॉलिवूडमध्ये प्रसिद्ध झाली आहे. याचा अभिमान कराड तालुक्यातील सर्व समाजाला आहे.